طريقة عمل مقلوبه البانيه والخضار
- الكمية تكفي: 4 أشخاص
- وقت التحضير: 15 دقيقة
- وقت الطهي: 60 دقيقة
1. المقادير:
- نص كيلو بانيه
- 3 بصلات كبار
- 1 طماطم
- خضار مشكل
- رز بسمتى
- كل التوابل اللى عندك
- وزيت طبعا
2. التحضير:
- جبت البانيه وقطعت بصلتين حلقات ووالطمطمايه حلقات
- وحطيت عليهم ملح وفلفل ودعكتهم جامد فى بعض وضفتهم على البانيه وقلبتهم وركنت الطبق شويه
- وبعدين قطعت البصله قطع صغيره وشوحتها فى الزيت
- بعد تشويح تقريبا لمده دقيقه ضفت الخضار
- وشوحتهم مع بعض شويه
- وضفت عليهم شويه ملح وفلفل
- فى خلال الفتره ديه كنت جبت كوبيتين رز وغسلته ونقعته فى الميه
- وصفيته وضفت عليه التوابل
- كان عندى فلفل كمون بهارات روز مارى بهارات كارى باربيكيا بس كترى الكميه شويه
- وطبعا الملح بس خدى بالك تقدرى الملح لانك مملحه البانيه والخضا
3. الطبخ: طريقة عمل مقلوبه البانيه والخضار
- جبت الحله اللى هسوي فيها المقلوبه
- هى بالكهربا بس مقدار الميه نفس اللى على النار
- رصيت اول طابق
- البصل اللى كان فى البانيه
- الطابق التانى البانيه
- الطابق التالت
- الخضار اللى شوحته مع البصله
- رابع طابق الرز بعد اضافه التوابل وتقليبه
- الخطوه الجايه مهمه جدا
- غطيت الرز بطبق اصغر من الحله
- كنت غاليه الميه وضفتها براحه على وسط الطبق
- عشان نزول الميه متفرقش الرز وتلخبط الدنيا
- وطبعا انا مش بعاير انا بالوايم كده كخبره بقى فى تسويه الرز
- يعنى تغطى الرز بالميه وخلاص
- شايفين الرز متساوى ازاى ده من الطبق اللى كان عليه
- وغطيتها وشغلت الكهربا
- ولو على نار
- يادوب تغلى وتوطى عليها جامد وتسبيها براحتها تستوى
- واليكم النتيجه بعد سواها وقلبها فى طبق مدور
